Christophe Nduwarugira : Twiteze intsinzi mu rukino na Tanzaniya

Umurwi "Intamba mu rugamba" witeguriye urukino ruhava ruwuhuza na Tanzaniya, mu nkino za CECAFA Challenge Cup ziriko zibera mu gihugu ca Kenya. Mu gatondo ko kuri uwu wa gatatu, imbere y’uko bafata urugendo rubashikana ku kibuga bakinirako na Tanzaniya isaha umunani, Christophe Nduwarugira (uwatsinze igitsindo ca mbere mu rukino rw’Uburundi na Somaliya), yamenyesheje mu kiganiro yagiranye n’ikinyamakuru IGIHE ko biteguriye intsinzi.

Christophe Nduwarugira "Lucio"

Christophe Nduwarugira, mu rukino ruheruka umurwi INTAMBA MU RUGAMBA waratsinzwe na Zambiya. Mbega mwoba mwagize izihe ngorane?

Ingorane twagize ni iyijanye n’ikibuga. Ntihari hameze neza, ivyondo vyari vyinshi cane. Twararonse imyanya yo gutsinda mugabo ntitwayikoresha neza. Abo twariko turakina baca baronka umwanya umwe gusa, babona gutsinda. Novuga ko ari integuro y’Imana.

Urukino rw’uno munsi na Tanzania, ari narwo rubaha uburenganzira bwo kubandanya ihiganwa murwiteguriye gute?

Urukino rwa Tanzaniya n’Uburundi turwiteguriye neza, kandi n’abakinyi bose bameze neza ntangorane n’imwe dufise. Dutegerezwa gutsinda.

Mu rukino rw’uno munsi mu basatirizi ntuzoba uri kumwe na Fiston Abdoulazak, ari nawe yatsinze igitsindo ca kabiri mu rukino rwa mbere na Somaliya. Mbega nta kinogo ubona kizoba gihari mu bakinyi b’imbere?

Ikinogo kizoba gihari kubera Fiston twari tumenyeranye cane gose, mugabo ndizeye n’uwundi (Gentil) azoba ahari. Nizeye ko ahava avyifatamwo neza.