Accueil > Ubutunzi > Iterambere > FIGA, ikigega kizoshigikira abanyamitahe bato
FIGA, ikigega kizoshigikira abanyamitahe bato
jeudi 4 Mukakaro 2013
Biciye ku biro vy’icegera ca kabiri c’umukuru w’igihugu, ishirahamwe ry’amabanki yo mu Burundi ABEF (Association des Banques et Etablissements Financiers du Burundi) ryatunganije kuri uyu wa kane igenekerezo rya 4 Mukakaro 2013 uruganda rwo kurabira hamwe n’uguhanahana ivyiyumviro ku cigwa cakozwe ku turusho twoboneka mu gihe hoshigwaho ikigega FIGA (Fonds d’Impulsion Economique, de Garantie et d’Accompagnement) kizoba kijejwe gushigikira no kuzamura abanyamitahe bagitangura.
Inyuma y’ivyiyumviro vy’abahinga batandukanye, umukuru w’ishirahamwe ABEF, Dr Pr. Cyrille Sigejeje yamenyesheje ko ico kigega kije hageze kuko abanyamitahe bakunda guhura n’ingorane cane cane iz’ukubura ingwati, ivyo bigaca bituma bataronswa ingurane. Yamenyesheje ko ico kigega kizoshobora kubera ingwati abanyamitahe bato bato, congere kibakurikirane mu migambi yabo. Yibukije ko ico kigega kitazosiga inyuma abafise imigambi y’uburimyi n’ubworozi kuko biri mu bisata vyinjiriza igihugu amafaranga y’agaciro.
- Dr Pr. Cyrille Sigejeje, umukuru w’ishirahamwe ABEF
Ico kigega kigiye gusahiriza abanyamitahe bipfuza kurangura imigambi yabo kikaba gihurikiyemwo ama banki yo Burundi nka Bancobu, BBCI, BCB, BGF, BNDE, CRDB, DTB, Ecobank, Finbank, FPHU, IBB hamwe na KCB.
Egide Nduwimana
