Ikigo CFCIB cahawe imfashanyo y’imiriyoni 150 z’amafaranga y’amarundi

Ubufaransa bubicishije ku buserukizi bwayo mu Burundi bwatanze imfashanyo igera ku miriyoni 150 amafaranga y’amarundi. Iyo mfashanyo ikaba yahawe ikigo kijejwe ubudandaji n’amahinguriro mu Burundi CFCIB (Chambre Fédérale de Commerce et d’Industrie au Burundi).

Kuri uno wa gatatu, igenekerezo rya 15 Nzero, ubuserukizi bw’ igihugu c’Ubufaransa mu Burundi bwarahaye imfashanyo ikigo CFCIB ingana n’imiriyoni 150 z’amafaranga y’amarundi. Iyo mfashanyo ikaba izofasha abadandaza baburiye ivyabo mw’isoko nkuru ya Bujumbura, ariko ayo mafaranga akazohabwa abo badandaza biciye mw’ishirahamwe ryo kuguranana, aho umudandaza wese azoshobora kuronswa ingurane izoja hagati y’amafaranga 500000 hamwe n’imiriyoni 2 z’amafaranga y’amarundi.

Uwurongoye ikigo CFCIB Econie Nijimbere akaba yashimye cane iyo mfashanyo, akamenyesha ko hazofashwa na cane cane abadandaza bato bato batarasubira gutangura kudandaza kuva isoko nkuru ya Bujumbura ihiye. Econie Nijimbere asaba n’abagiraneza bandi kugira ico bafashije.

Mwomenya rero ko iyo mfashanyo itanzwe hasigaye iminsi 11 gusa umwaka ukaba urangire isoko nkuru ya Bujumbura ihiye. Iyo soko n’ubu ikaba ikiri umusaka, ata na kimwe kirakorwa mu kuyisanura.