Inama nkuru ku butunzi mu makungu

Abategetsi bavuye mu bihugu bikomakomaye vyo kw’isi mu vyerekeye ubutunzi, baraye barangije inama yabereye mu gihugu c’Ubusuisse, aho bagabishije bavuga kw’intambwe mu gikorwa co kuzamura ubutunzi mu makungu, ikiri ndende.

Umuyobozi w’ikigega mpuzamakungu, FMI, Christine Lagarde, mu kiganiro yashikirije ejo ku musi wa gatandatu ari mu gisagara ca Davos mu gihugu c’Ubusuisse, yavuze kw’akizero ku butunzi buriko burisununura buhoro buhoro, kazova ahanini ku ngingo nyazo, ibihugu bikomeye mu vyerekeye ubutunzi vy’ibulaya, Leta zunze ubumwe za amerika hamwe n’Ubuyapani, bizofata.

Yarateye akamo ibihugu 17 vyo mw’ishirahamwe ry’ibulaya bikoresha ifaranga rya Euro, abisaba gukomera ku migambi nyayo yerekeye ubutunzi, yongera arashima kw’ibihugu bibiri vy’ibulaya, Ubutaliyano hamwe na Espagne, vyasimvye amakuba y’ikibazo c’ubutunzi mu bihugu vy’ibulaya.