Ingabo z’abafaransa zizogumizwa muri Mali

Mu rugendo yarimwo mu gihugu ca Mali, Umushikiranganji w’ubufaransa ajejwe imigenderanire n’ibindi bihugu, Laurent Fabius, yamenyesheje ko igihugu ciwe kigiye kurungika abasirikare igihumbi bamaho, bazofasha kubumbatira umutekano inyuma y’iyirukanwa ry’imirwi y’iterabwoba.

Ivyo uwo mushikiranganji yabishikirije igenekerezo rya 5 Ndamukiza aho yari mu rugendo I Bamako, mu kiganiro yahaye abanditsi n’abamenyeshamakuru, inyuma y’umubonano yagiranye n‘uwutwara igihugu ca Mali vy’imfatakibanza, Dioncounda Traoré.

Mu gihugu ca Mali kuva ku genekerezo rya 11 Nzero, igitigiri c’ingabo z’abafaransa zitegerezwa kuva ku bihumbi bine zigabanuke gushika ku bihumbi bibiri, imbere y’ukwezi kwa Mukakaro, ivyo bikazokorwa mu ntumbero yo kwubahiriza amasezerano yagizwe hagati y’ivyo bihugu vyompi ajanye n’igikorwa co gukura ingabo z’abafaransa mu gihugu ca Mali.

Umushikiranganji w’ubufaransa ajejwe imigenderanire n’ibindi bihugu amenyesha ko ico kiringo bumvikanye kizokwubahirizwa.