Inkino z’umupira w’amaguru zizobera muri Bresil zizokwerekanwa zose kuri RTNB

Abatari bake mu Burundi bari bafise umwikomo waho bazorabira inkino z’umupira w’amaguru zizobera mu gihugu ca Bresil. Abarongoye insamirizi n’imboneshakure y’igihugu bamenyeshejeko bazokwerekana inkino gushika ku ryanyuma.

Thaddee Siryuyumunsi arongoye RTNB

Thaddee Siryuyumunsi arongoye insamirizi n’imboneshakure vy’Uburundi(RTNB)yakuye umwikomo abahora bafise ubwoba ko batazokwirikirana inkino z’umupira w’amaguru zizobera muri Bresil. Uwo mutegetsi avuga ibikenerwa vyose vyamaze gushirwaho, aha avuga ko n’inkino zizoba amasaha yitereye bamaze kubitegura neza.

Thadde Siryuyumunsi yibutsa abakunzi b’inkino ko imboneshakure y’uburundi ataco izosaba abo bose bazoba bariko barakwirikirana inkino. Arangiza ashimira abo bose bafashije kugira ivyo bikunde.

Mwomenyako ko hasigaye iminsi 5 kugira urukino rwa mbere ruzohuza igihugu ca Bresil na Croatie rube, hazoba ari kw’igenekerezo rya 12 Ruheshi, i Sao Polo.