Intara ya Mwaro ikwiye kuronswa ibarabara rya kaburimbo

Mu gihe yariko arashikiriza ivyaranguwe mu kiringo c’amezi atandatu mu ntara ya Mwaro, buramatari w’iyo ntara Jean Polidore Ndayirorere yamenyesheje ko ukubura ibarabara risize kaburimbo rica ku murwa mukuru w’intara ya Mwaro biri mu bihagarika iterambere ry’iyo ntara.

Jean Polidore Ndayirorere amenyesha ko ibarabara Nyakararo-Mwaro-Gitega ryofasha cane mw’iterambere ry’intara ya Mwaro na cane cane ko ryofasha gushika mu bibanza vy’ingenzi (site touristique) bisanzwe biri muri iyo ntara.

Intara ya Mwaro niyo yonyene mu gihugu cose idafise ibarabara risize ikaburimbo rica ku murwa mukuru w’intara. ikindi kibangamiye iterambere rya Mwaro ni amategeko adatomoye ku bijanye no kurwanya inzoga zitemewe hamwe n’amashure asanzwe ari make muri iyo ntara. Ku misozi 131 igize intara ya Mwaro, umunani niyo itagira ishure.