Accueil > Amakuru > Utuntu n’utundi > Inyuma yaho se wa George Bush yihendeye ku rupfu rwa Mandela, yasavye (...)
Inyuma yaho se wa George Bush yihendeye ku rupfu rwa Mandela, yasavye imbabazi
lundi 2 Nyakanga 2013
George Bush, se wa Georges W Bush yigeze kurongora igihugu ca Leta zunzubumwe z’Amerika, yaranditse ikete ry’uguhoza umuryango wa Nelson Mandela n’igihugu cose c’Afrika y’Epfo, ku rupfu rwa Nelson Mandela.
Bush n’umuvugizi wiwe bakaba babonye ko bihenze kuri urwo rupfu rwa Nelson Mandela, inyuma y’akanya gato, itangazo ryamaze kuja ahabona. Inyuma y’aho, umukuru w’igihugu wa 41 wa Leta zunzubumwe z’Amerika akaba yaciye yandika itangazo ryo gusaba imbabazi, ku kwihenda ku rupfu rwa Mandela, aho yanditse ati : « Jewe n’umutambukanyi wanje Barbara twari twatanguye kuririra Mandela, umuntu tuzi ko yaharaniye ukwigenga kw’abanyagihugu, kandi natwe tuzi cane.»
![](local/cache-vignettes/L470xH321/bush_ma-0eb7f.jpg?1517528200)
Muri iryo tangazo ry’uguhoza umuryango wa Mandela n’igihugu cose c’Afrika y’Epfo, Akaba yari yanditse ko Mandela yari umuntu akerebutse, yahinduye ibintu vyinshi mu gihugu ciwe, ndetse akaba yamusabira kugira ibihe bidashira. Ku buhinga ngurukana bumenyi bwa Twitter, umuvugizi wa George Bush ariwe Jim McGrath avuga ko mu kurungika ubwo butumwa yihenze mu gusoma nabi ijambo ry’umutwe w’ikinyamakuru Washington Post. Akaba nawe nyene asaba imbabazi abantu bose, bari bamaze kwumva iryo tangazo ry’urupfu rwa Mandela. Avuga ko ari ikosa ryiwe nk’umuvugizi, ariko ko atari ikosa rya Bush, asanzwe avugira.
![](local/cache-vignettes/L616xH400/mand-8d842.jpg?1517528200)
Aristide Nizigire