Inzoya n’abakenyezi barafatwa kunguvu

Intumwa ya ONU mu bijanye no kurwanya gushurashuza abakenyezi ku nguvu mu ntambara yavuze ko yiyemeje kurwanya ubwo bubisha bukorwa n’abasirikare hamwe n’abarwanyi muri Kongo.

Zainab Bangura yavuze ko abarwanyi bafata abantu ku nguvu bakabasambanya, bagomba gutohozwa, bagakurikiranwa mu butungane kandi bagapfungwa ata kigongwe.
Yongeye ko umukuru w’igihugu wa republika iharanira intwaro rusangi ya Kongo, Joseph Kabila, yamwemereye ko abarwanyi bazoja baragirizwa icaha c’ugufata ku nguvu abakenyezi ko batazoshirwa mu nzego za Leta canke izijejwe umutekano.

Umupfasoni Bangura yavuze kandi ko benshi mu bahohoterwa mu buseruko bwa Kongo ari abana, harimwo n’inzoya ,ati birateye isoni kubona hakiri abantu bagifise agatima k’ubunyamaswa nk’ubwo.