Iran: Uwatsindiye ikibanza c’umukuru w’igihugu yamenyekanye

Umwigisha wa Islam ashigikiwe n’abashaka ihinduka, Hassan Rouhani, yatsinze amatora y’umukuru w’igihugu wa Irani ku majwi arenga gatoyi 50 kw’ijana.

Isinzi ry’abantu bahuriye ku murwa mukuru wa Irani Tehran gukeza Rouhani, akaba yamenyesheje ko ari intsinzi y’abari hagati ku banyamacakubiri.

Ayo matora yari yitabwe gushika ku bice 72.2 kw’ijana mu banyagihugu ba Irani imiriyoni mirongo itanu bari bemerewe gutora uwutegerezwa gusubirira Mahmoud Ahmadinejad.

Umukuru w’igisagara ca Tehran, Mohammad Baqer Qalibaf akaba yararushijwe cane.

Ayatollah Ali Khamenei yakeje Rouhani ku ntsinzi yiwe, akaba azoca yemeza icese ivyavuye mu matora ku genekerezo rya 3 Myandagaro, umukuru w’igihugu mushasha nawe ace arahirira imbere yo kwinjira icese mu mabanga, akaba azorahirira imbere y’inama nshingamateka.