Ishirahamwe ry’abanyaburaya ryahaye intererano Somaliya

Ishirahamwe ry’ibihugu vya buraya ryemereye igihugu ca Somaliya imiriyoni 44 z’amafaranga y’amanyaburaya azofasha mu kwongereza inguvu mu bisata vy’ubutungane n’umutekano.

Ivyo vyashikirijwe mu nama yo kwiga ingene igihugu ca Somaliya cogarukirwa inyuma y’imyaka mirongo ibera kiri mu ntambara, iriko ibera mu gisagara ca Londres.

Mw’itangazo uwujejwe iterambere mw’ishirahamwe ry’abanyaburaya, Andris Piebalgs yashize ahabona, yashikirije ko urwego rw’ubutungane nyakuri arirwo ruzoshobora kugarukana umwizero w’abanyagihugu rukongera rukabanywanisha.

Ishirahamwe ry’abanyaburaya rimaze guha imfashanyo ingana n’imiliyaridi 1,2 z’amafaranga y’amanyaburaya kuva mu mwaka w’2008, nk’uko babandanije babishikiriza muri iryo tangazo.

Ubutungane bwizewe na bose kandi bwigenga nibwo buryo bubereye bwogusubiza hamwe abanyagihugu bo muri Somaliya.