Ishure CFPP n’uburongozi bwa komine ntibumvikana ku kibanza kiri mu Nyakabiga

Abarongozi b’ishure ry’imyuga(CFPP) ryo mu Nyakabiga bamenyesha ko baguye mu gahundwe kuri uno musi aho bariko bubaka uruzitiro rw’ikibanza bashaka kuzokwubakamwo muri komine Nyakabiga bagaca babona umurwi w’abapolisi barongowe na musitanteri w’iyo komine Eri Nkurunziza.

Abarongoye iryo shure bamera ko impapuro zibaha uburenganzira bwo kwubaka zemewe n’amategeko kandi bazihawe n’ubuyobozi bujejwe gutunganya ivyamatongo. Nk’uko twashoboye kuvyibonera ku mpapuro, urwo ruhusha rwatanzwe ku genekerezo rya 5 Nyakanga 2012.

Innocent Havyarimana umukuru wa sendika y’abakozi bo kw’ishure ry’imyuga CFPP akamenyesha ko atumva igituma musitanteri wa komine Nyakabiga ariko arababurabuza kandi ata zindi mpapuro arerekana zibaka uburenganzira bwo kwegukira ico kibanza.

Twagerageje kurondera Eri Nkurunziza musitanteri wa komine Nyakabiga atumenyesha ko ataco afise abivugako muri uwo mwanya, tukaba tuzobandanya tumurondera atange umuco kuri ayo matati ari hagati y’ishure ry’imyuga CFPP n’uburongozi bwa komine arongoye kuri ico kibanza kiri i ruhande ya komine Nyakabiga.