Jacob Zuma asaba kwubahiriza iragi rya Madiba

Umukuru w’igihugu c’Afrika y’Epfo Jacob Zuma mw’ijambo ryiwe yasavye kwubahiriza iragi rya Nelson Mandela, kugira ntibamutetereze. Ivyo yabishikirije mu gihe bari mu birori vyo gufubana iteka uwo muhisi.

"Urugendo rwawe rurerure rujana ku mwidegemvyo mu buryo bw’umubiri rusa n’uruheze.Ariko urugendo rwacu rurabandanya, dutegerezwa kubandanya kwubaka igihugu wakoreye. Dutegerezwa kubandanya iragi wadusigiye", ivyo bikaba vyavuzwe n’umukuru w’igihugu Jacob Zuma .

"Afrika y’Epfo izobandanya ikura, kuko tudakwiriye kuguhemukira ku vyo waturaze. ‘Turakwemereye uno munsi kubandanya guteza imbere ukwihanganirana hamwe n’igihugu kirimwo ubwoko bwose, hamwe no kwubaka Afrika y’Epfo ya bose
", nayo akaba ari amajambo ya Jacob Zuma.

Nelson Mandela yatanguye kuba rurangiranwa kubera yiyamirije ubutegetsi bw’abazungu bwashaka gucinyiza abirabure mu myaka y’1980 imbere nuko arekurwa. Nelson Mandela yarashoboye kandi kurinda indwano y’abanyagihugu ifatiye ku rukoba. Yarashoboye kunywanisha abanyagihugu akaba yashize imbere guharirana. Akaba ariwe yabaye umukuru w’igihugu wa mbere w’umwirabure avuye mu matora ya mbere ahuriyemwo bose yo mu mwaka wa 1994.