Jacob Zuma yanse gusubira gushigikira Igisoda ca Centrafrika

Umukuru w ‘igihugu ca Afrika y’epfo, Jacob Zuma, yatangaje ko amasezerano yo gufashanya mu vya gisirikare igihugu ciwe cari caragiranye na centrafrika ubu yabaye impfagusa inyuma yaho ubutegetsi bwa Francois Bozize buhirikiwe.

Umukuru w’igihugu Jacob Zuma ahanganye n’ishavu ryinshi ry’abanyagihugu b’igihugu ciwe inyuma yaho abasirikare ba Afrika yepfo 13 bahitanywe n’umurwi urwana Seleka muri Repubulika ya centrafrika mu kwezi guheze.

Ico cemezo co gutahukana abasirikare ba Afrika y’epfo, Jacob Zuma yagitangaje mu nama idasanzwe ku gihugu ca centrafrika yabereye muri Tchad ku musi wa gatatu.
Abakuru b’ibihugu bari muri iyo nama baranse kwemera umukuru w’uyo murwi urwana wahiritse ubutegetsi muri centrafrika, Michel Djotodia.

Michel Djotodia yari yatangaje ko azorongora igihugu kugeza ku matora ategekanijwe mu mwaka wa 2016.