Kagame na Kikwete bagiranye ikiganiro i Kampala

Nk’uko vyari bitegekanijwe, umukuru w’igihugu c’Urwanda Paul Kagame na mugenzi we wa Tanzaniya Kikwete babonaniye i Kampala kuri uyu wa kane igenekerezo rya ya 5 Nyakanga 2013.

Umubonano wabo ukaba wabaye imbere y’uko bitabira iyindi nama yahuza abakuru b’ibihugu vyo mu karere k’ibiyaga binini, aho nyene i kampala.

N’aho ivyo baganiriye bitaramenyekana, uwo mubonano wabo uje nyuma y’igihe umubano w’Urwanda na Tanzaniya wari umaze iminsi utifashe neza.
Icuka kibi muri uwo mubano caturutse ku majambo umukuru w’igihugu Kikwete yari yavugiye i Addis Abeba, asaba Urwanda kuganira na FDLR, umurwi w’abarwanyi Leta y’Urwanda yagiriza ko ufise uruhara mu honyabwoko ryabaye muri ico gihugu mu mwaka w’1994.

Abo bakuru b’ibihugu bakaba babonanye mu gihe n’ubundi bari bagiye guhurira i Kampala mu nama y’abakuru b’ibihugu vyo mu karere k’ibiyaga binini, barabira hamwe icokorwa kugira intureka ziri mu buseruko bwa Congo zohagarara.