Kaka yatangaje umurwi wa Real Madrid mu kubasezera batavyiteze

Umukinyi w’umupira w’amaguru asanzwe aturuka mu gihugu ca Brésil, azwi kw’izina rya Ricardo benshi bazi kw’izina rya Kaka, aherutse gutangaza abantu aho kuri uyo wa kane yasezera ku mugaragaro umurwi yahora akinira Real Madrid inyuma yo kuwutsindira ibitsindo bibiri mu rukino rwabahuza n’umurwi wa Deportivo La corogne.

Kaka mu rukino na Deportivo

Inyuma yo kudakinishwa kenshi n’uwahoze amenyereza uwo murwi José Mourinho, Kaka yari yarambiwe ntiyipfuza ko biguma nk’uko vyahora mu myaka mike iheze. Ariko umumenyereza mushasha wa Real Madrid Carlo Ancelloti afatiye ku kungene uwo mukinyi yavyifatamwo akiri mu murwi wa Milan AC niwe yari yizigiye uyu mwaka.

Ariko rero siko bigenze kuko Kaka yamenyesheje ko iciza kuri we n’umurwi Real Madrid aruko yokwigendera. Amenyesha ko se wiwe ariko aravugana n’umurwi wa Real, akaba arindiriye inyishu itomoye kuri uyu wa mbere uza. Nk’umukinyi wundi wese ageze ku ntambwe nk’iyo Kaka agezeko, yipfuza kuzokinira igihugu ciwe mu gikombe c’isi yose mu mwaka w’2014 kizobera muri Brésil, ariko ikigihaze n’uko asanzwe adatangura mu murwi wiwe Real Madrid.

Nk’uko ibimenyeshamakuru vyaho muri Espagne vyibaza, Kaka yoba yashatse gusubira mu murwi wiwe wa kera Milan Ac yari yavuyemwo mu mwaka w’2009 ku giciro c’imiriyoni 62 kugira aje muri Real Madrid.