Kamenge : Isoko ya kijambere iriko irubakwa yitezwe n’akamwemwe kenshi

Isoko ya kijambere iriko iruba mw’isoko ya kera ya Kamenge. Ibikorwa muri iyo soko, bikaba biriko biragenda neza nk’uko bivurwa na Nestor Cishahayo umukuru w’ isoko yo mu Kamenge mu gisagara ca Bujumbura.

Ibikorwa vyo kwubaka iyo soko ya Kijambere biriko biragenda neza, ndetse ivyo bikorwa bikaba biba no ku minsi ya gatandaru. Bamwe mu bubaka ukaba usanga bariko barashira amabati ku nyubakwa y’iyo soko, abandi nabo ugasanga bariko barasiga impome, eka abandi bari mu bindi bikorwa bitandukanye nko gushirako amadirisha n’imyango.

Iyo soko yo muri komine ya Kamenge rero ni yuzura, abazoyidandarizamwo ubwa mbere, bakazoba abasanzwe bahafise ibibanza kuva kera, ubu bakaba baramaze kubasansuma. Ni hagira ibibanza bihasigara, bikazohabwa abandi badandaza.

Iyo soko rero ikaba yubatswe ku buryo ibindandazwa vyose bizoba bifise aho biri. Hari ikibanza kizoba kidandarizwamwo inyama gusa hamwe n’amafi, ico kibanza kikazoba gifise ndetse n’ivyuma vyo gukanyisha ivyo bidandazwa kugira ntibishobore kwononekara. Ibindi bibanza akaba ari ivyo kuzondandarizwamwo impuzu, ibifungurwa bitandukanye, ibirato, ibintu bikenerwa mu bundi buzima, n’ibindi.

Abadandariza muri iyo soko bakavuga ko bari barushe no kudandariza mw’isoko ya kera, mu gihe imvura iguye atamuntu yasubira kuyiturukira, kuko wasanga ivyondo bijaga, abasumyi bagaca batinya kuza, eka n’abadandaza bakavuga ko bapfa kuhicara, kuko atakundi baba bari bugire, mu gihe baba batinya ko ibidandazwa vyabo vyobora.