Kenya: La haye yakuye ibirego kuri Francis Muthaura

Abashikirizamanza kuri sentare mpuzamakungu mpanavyaha y’i La Haye, bakuye ibirego bijanye no guhohotera ikiremwa muntu bagiriza uwahoze ari umuyobozi mukuru ajejwe abakozi ba leta muri Kenya, Francis Muthaura.

Umushikirizamanza mukuru, Fatou Bensouda, yavuze ko ata kundi yari kubigenza kiretse gukura ivyo birego kuri bwana Muthaura, nyuma y’aho icabona nyamukuru kivugiye ko cabeshe.

Bensouda yavuze ko ivyo birego bari bashikirije ata mutima mubi urimwo ariko ko uko umwanya wagiye urahera, bamwe mu vyabona bapfuye, abandi nabo bagatinya gushikiriza ivyo bazi.

Ivyo bikaba kandi Leta ya Kenya yari yemeye kuzofasha mu bizokenerwa vyose.
Uwo mushikirizamanza yavuze ko afise ibigaragaza ko ivyabona bihabwa igifukamunwa.

Francis Muthaura yari kumwe na Uhuru Kenyatta aherutse gutsindira amatora y’umukuru w’igihugu co kimwe mbere n’uwo bitoreje hamwe William mu kwagirizwa kugira uruhara mu ntureka zakurikiye amatora yo mu 2007.