Kongo :Abamenyeshamakuru 4 bagirizwa gutera ubwoba umukuru w’inama nshingamateka

Aba menyeshamakuru bane bo muri Congo Kinshasa bagirizwa ko boba barateye ubwoba umukuru w’inama nshingamateka w’ico gihugu Aubin Minaku.
Abo bamenyeshamakuru bakorera ibinyamakuru “Le monde”,”Le réseau”,” Le monitor” na “Le future” bikorera i Kinshasa.

Radio Okapi imenyesha ko abo bamenyeshamakuru Albert Tshibende, Norbert Nkonde, Pascal Mulunda na Jenny Avedila batawe muri yompi kuri uyu wa kabiri mu gihugu ca Repubulika iharanira intwaro rusangi ya Congo, bakaba bagirijwe n’ubutungane ko bitwaje izina rikomeye bafise mu binyamakuru baca bashaka ku mukanga.

Aubin Minaku avuga ko ku wa mbere, yabonye abo bamenyeshamakuru baza arabakira azi ko bashaka amakuru, haheze akanya baciye bamwereka ibinyamakuru bari banditse bamuvuga nabi, baciye bamusaba ko yobaha ama faranga ngo ntibabisohore.

Aya makuru kandi aremezwa na Mulenga Mwalaba Sam, umunyamabanga wa mbere mu vy’ubutungane mu biro vy’umukuru w’inama nshingamateka. Yagize ati "Abo bagabo, baje bavuga ko bateguye inkuru zituvuga nabi, ko babifitiye n’ivyemezo kandi ko ayo makuru bayahawe n’abayobozi bakuru mu biro vy’inama nshingamateka.