Ku ncuro ya mbere buca yitaba sentare nkuru isubiramwo imanza

Umukuru w’ishirahamwe APRODH Petero Karaveri Mbonimpa yitezwe muri sentare nkuru isubiramwo imanza mu gisagara ca Bujumbura, aho azoba aroye kwumvirizwa ku vyo yagirizwa bijanye n’amasanamu yerekanye y’urwaruka, bivugwa ko ari abarundi bariko biga igisoda mu gihugu kibanyi ca Repuburika iharanira intwaro rusangi ya Kongo.

Kuri uyu wa kane igenekerezo rya 5 Ruheshi uyu mwaka, Petero Karaveri Mbonimpa akaba azorenguka, kugira yumvirizwe, baheze abacamanza barabe namba yorekurwa inyuma y’amasaha 48 canke akaguma apfungiwe mw’ibohero rikuru rya Mpimba. Petero Karaveri Mbonimpa asanzwe arongoye ishirahamwe riharanira agateka ka zina muntu n’akabanyororo APRODH, akaba amaze amajoro 18 mw’ibohero rikuru rya Mpimba, aho yarungitsweyo n’icariho c’umushikirizamanza mu gisagara ca Bujumbura Salvator Ndayiziga batazira Nyamizi.

Mwomenya ko kuva uwo ari mu mashirahamwe aharanira agateka ka zina mu ntu n’akabapfungwa atanguye gukurikiranwa ndetse agatabwa mu mvuto, amashirahamwe atandukanye yaba ayo mu Burundi canke mpuzamakungu, yose yagumye asaba ko uyo mutama w’imyaka 66 yorekurwa, akaburana yidegemvya, ndetse akanafasha igiporisi n’ubutungane gutanga umuco ku matohoza yagize y’abariko baragira iyo myimenyerezo.