Laurent Bagbo ariko yiyamamarizwa kurongora umugambwe

Laurent Bagbo yahoze arongoye igihugu ca Cote d’Ivoire yamamarijwe kurongora umugambwe yashinze mu mwaka w’1982.

Laurent Bagbo asanzwe anapfungiwe mw’ibohero ry’i La Haye kubera ivyaha yagirijwe vyo guhohotera ikiremwa muntu, ni nawe mukuru w’igihugu umwe rudende anapfungiwe muri iryo bohero. Laurent Bagbo na Pascal Affi N’Guessan akaba aribo batanzwe na comite nshingwantwaro y’umugambwe FPI (Front Populaire Ivoirien). Bamwe mu bari muri uwo mugambwe bakabona ko Bagbo bitokunda ko atwara uwo mugambwe mu gihe asanzwe atiyandikiye ikete n’iminwe kugira asabe kurongora umugambwe, bati eka noneho, ntivyokunda kuko asanzwe ari mw’ibohero, atorongora umugambwe abayoboke biwe batamubona.

Uwo mutama w’imyaka 69 y’amavuko asanzwe ari mw’ibohero kuva mu mwaka w’2011 akaba yagirizwa na sentare mpanavyaha mpuzamakungu kuba yarahohoteye agateka ka zina muntu n’ibindi vyaha bikomeye, igihe yari arongoye ico gihugu.