Libreville : Abarwizatunga b’abarundi bari mu nama na bagenzi babo bo muri Gabon

Mu gisagara ca Libreville, kuva ku munsi wa kabiri hariko harabera inama hagati y’abarwizatunga b’abarundi n’abo mu gihugu ca Gabon, iyo nama ikaba ije yisunga iyaheruka kubera i Bujumbura haraheze amezi make.

Muri iyo nama yatunganijwe n’igisata kiraba ivy’ubudandaji mu gihugu ca Gabon, intumbero nyamukuru ni ugukomeza imigenderanire hagati y’abarwizatunga b’ivyo bihugu vyompi, kakazoba kandi n’akaryo ku barwizatunga b’abarundi ko kwirabira uko abandi bakora n’inyungu yo kwagura imihora na kare ko « Akanyoni katagurutse katamenya iyo bweze.»

Iyo nama izofasha gukomeza kandi ubucuti hagati y’amashirahamwe n’amahinguriro mato n’ayabayabaye yo muri ivyo bihugu vyompi, hakaba hategekanijwe n’ihayanishwa gurisha.

Tworangiza tubamenyesha ko hateguwe kandi imibonano hagati y’abarongoye amahinguriro n’amashirahamwe bitavye iyo nama, aho bazorabira hamwe ingene boteza imbere ibisata vy’uburimyi, ubworozi, uburovyi, ibisata vyo kwenga, ububaji, amabanki, amagara y’abantu, igisata c’ingenzi, n’ibindi