Mali:Abasirikare b’ubufaransa bagiye kugabanywa kuva muri Ndamukiza

Kuri uno wa gatatu igenekerezo rya 6 Ntwarante 2013,umukuru w’igihugu c’Ubufaransa Francois Hollande ari i Varsovie muri Polonye,yaramenyesheje ko abasirikare b’Ubufaransa bari mu gihugu ca Mali bazogabanywa kuva mu kwezi kuza kwa Ndamukiza.

Nk’uko amakuru dukesha itororokanirizo ry’amakuru ry’abafaransa AFP ribimenyesha,umukuru w’igihugu c’Ubufaransa yavuze ko igikorwa c’abasirikare kizobandanya ukwezi kwa Ntwarante kwose,ariko kuva mu kwezi kwa Ndamukiza uno mwaka bazoca bagabanywa.

Umukuru w’igihugu Francois Hollande ntiyamenyesheje ariko igitigiri c’abasirikare bazosigara muri Mali canke umwanya bazomarayo.

Mu ntango z’ukwezi kwa Ruhuhuma,umushikiranganji w’imigenderanire y’Ubufaransa n’ayandi makungu Laurent Fabius yari yamenyesheje ko ikurwa ry’abasirikare muri Mali ryotanguye muri uku kwezi kwa Ntwarante ari hamwe ibintu bigenze nk’uko vyari vyitezwe.

Ku bijanye n’urupfu rwa Abou Zeid umwe mu bategetsi ba Al-Qaida,Hollande yavuze ko Leta y’Ubufaransa ibona ko vyoba arivyo ariko ko atavyemezo bifashe biriho.

Mwomenya ko abasirikare b’abafaransa 4000 aribo bari mu gihugu ca Mali.