Mali: Umuji wa Timbuktu nawo uri mu gufatwa

Abasirikare b’Abafaransa bariko baregereza umuji wa Timbuktu mu buraruko bwa Mali, wari usigaye ukiri mu minwe y’abarwanyi ba ki Islam.

Abanyamakuru bari muri Mali bavuga ko vyitezwe ko Abafaransa bafata Timbuktu ata nkomanzi.

Habaye kandi ibitero vy’indege mu muji wa Kidal, aho ibitero vy’abarwanyi muri Mali vyatanguriye mu kwezi kwa Gatatu mu mwaka uheze.

Kuwa Gatandatu abasirikare b’Ubufaransa n’aba Mali bamenyesheje ko bafashe umuji wa Gao abarwanyi bari bakomeyemwo.

Vyitezwe ko ikibazo ca Mali ciharira umwanya munini mu nama y’umuryango w’ubumwe bwa Afrika iriko irabera ku murwa mukuru wa Ethiopia, Addis Ababa.