Maroc : Imiyabaga ipfunzwe yagirizwa kwiyandagaza mu gusomana

Hari imiyabaga yo mu gihugu ca Maroc yahagaritswe n’igipolisi yagirijwe ko yashize ifoto yabo bariko barasomana ku rubuga rwa Facebook i Nador, mu Buraruko bushira Ubuseruko bw’igihugu ca Maroc nk’uko bimenyeshwa n’ishirahamwe rimwe ryo muri ico gihugu.

Abo bafashwe akaba ari umwana w’umuhungu ari kumwe n’umwigeme bari mu myaka y’ubuyabaga, bakaba bagirwa n’icaha c’ukwiyandagaza ku mugaragaro, icaha gihanwa n’amategeko y’ico gihugu, kijanye n’uguta akaranga, inyuma yaho bashiriye ifoto yabo bariko barasomana ku rubuga ruhurirwako n’abantu benshi rwa Facebook, nk’uko bivurwa na Chakib Al Khayari arongoye Association Rif , ishirahamwe ryitaho agateka ka zinamuntu riri i Nador. Amakuru abandanya avurwa ni ukwo abo bana n’ubu batararekurwa n’aho amashirahamwe aharanira agateka ka zinamuntu ariko arabandanya ababuranira kugira barekurwe, nk’uko bibandanya bivurwa na Al Khayari.

Abo bana babiri rero, bakaba biga mw’ishure ryisumbuye aho i Nador, ndetse bakaba arinaho bashiriyeko iyo foto yabo. Abajejwe intwaro baho i Nador baremeza ayo amakuru, ariko ntaco bashima kubivugako. Iyo ngeso mu gihugu ca Maroc ikaba yabaye nk’akaranda, aho abakiri bato benshi bashira amafoto kuri ubwo buhinga ngurukanabumenyi bari muri ubwo buhumbu.