Masanganzira: Abapakira n’abapakurura imizigo barabeshejweho n’ishirahamwe ryabo

Gupakira no gupakurura imiduga minini mini biratunze imiryango itari mike, nk’uko vyemezwa n’abanyagihugu bo ku Masanganzira, muri komine ya Kiremba mu ntara ya Ngozi basanzwe bahurikiye mw’ishirahamwe Karaninguvu

Abari mw’ishirahamwe Karaninguvu ry’aho ku masanganzira bavuga ko ubuzi butandukanye, kuko hari abarima, hakaba abadandaza, abakozi ba Reta, hakaba n’abapakururura canke bagapakira imizigo n’abandi. Kuva biyumviriye kugira ishirahamwe ryabo, Karaninguvu, bavuga ko ribateza imbere kuko ku munsi ku munsi bavuga baronka amafaranga atunga imiryango yabo, ku kwezi naho ko babitsa amafaranga angana n’ibihumbi 150.000, mu gupakira canke gupakurura imiduga.

Nk’uko abari muri iryo shirahamwe babivuga, umurwi wabo ugizwe n’abantu 37, bakaba bamaze imyaka 12 batanguye iryo shirahamwe ryo gupakira no gupakurura imizigo. Kugira batangure iryo shirahamwe, bavuga ko babisabwe na bamwe mu badandaza b’aho ku Masanganzira kuko bavuga ko bagira ingorane iyo hariko harapakururwa imizigo yabo, kuko hari imwe wasanga yazimiye, ubu bakaba bose bambara ibibaranga, udufurani tw’ibira ry’umuhondo.

Kenshi, ubona abari muri iryo shirahamwe, bambaye impuzu zisa, bariko bariruka inyuma y’imiduga mito mito canke minini minini, iri ku masanganzira. Umukuru wabo rero akaba ariwe abaha itegeko ukwo bakora, abaramukiwe, canke abagira baruhuke. Abatigenjeje neza nabo, barahabwa igihano co kumara iminsi 15 badakora.

Abari muri iryo shirahamwe rero bavuga ko bashimishwa n’intambwe bagezeko kuko akazi bagahejeje baca baja hamwe bakagabura bose amafaranga, kandi bakanganya.