Accueil > Inkino > FOOTBALL > Messi ararwaye inyonko
Messi ararwaye inyonko
jeudi 28 Ruhuhuma 2013
Umusatirizi ava mu gihugu ca Argentine akinira umurwi wa FC Barcelona Lionel Messi ntiyitavye imyimenyerezo yo kuri uno wa gatatu igenekerezo rya 27 Ruhuhuma,imvo ni kubera afise inyonko.
Nk’uko umurwi wa FC Barcelone wabimenyesheje ubicishije ku murongo wawo wa internet,abaganga bamusanze aho aba,baramuha imiti baca bamuhanura ko yofata umwanya wo kuruhuka.
Lionel Messi yakinye urukino rwose rwo kuri uno wa kabiri igenekerezo rya 26 Ruhuhuma 2013 aho umurwi wiwe wahura na Real Madrid mu gice ca kabiri gishira ica nyuma,mu rukino rwo gusubiriza,FC Barcelone yatsinzwe ibitsindo bitatu kuri kimwe,uca urava mw’ihiganwa.
Umurwi FC Barcelone wizeye ko Lionel Messi yatwaya umupira w’inzahabu incuro zine zose zikurikirana azokina urukino ruzowuhuza na Real Madrid kuri uno wa gatandatu mu rukino rwo mw’ihiganwa ryo mu gihugu ca Espagne,urukino ruzobera ku kibuga ca Bernabeu mu gisagara ca Madrid.
Tubamenyeshe ko Messi amaze gukina inkino zose zo mw’ihiganwa rya Espagne,umurwi wiwe ukaba uza imbere n’amanota 12 urusha Athletico Madrid ya kabiri,n’amanota 16 urusha Real Madrid ya gatatu.
Mugisha Van Naris
Messages
1er Ntwarante 2013, 03:21, par AKALISE
inyoko ni iki?