Misiri : Leta mfatakibanza yarahiye icese

Leta y’imfatakibanza yagiyeho inyuma y’aho umukuru w’igihugu Mohamed Morsi atembagarijwe ku butegetsi yaraye irahiye icese imbere y’umukuru w’igihugu Adly Mansour, nawe nyene w’imfatakibanza.

Mu barahiye harimwo Abdul Fatah al Sisi yahora ari umukuru w’ingabo za Misiri yarahiye nk’icegera c’umushikiranganji wa mbere n’umushikiranganji wo kwivuna abansi.
Naho iyo Leta mfatakibanza yaraye irahiye icese, imigumuko irabandanya. Abantu 400 nibo bamaze gutabwa muri yompi mu bari mu myiyerekano yo gushigikira Mohammed Morsi yakuwe ku butegetsi.

Uwahora ari umukuru w’igihugu Morsi yakuwe ku butegetsi n’igisirikare kw’igenekerezo rya gatatu Mukakaro, gishigikiwe n’isinzi ry’abanyagihugu.
Umugambwe Muslim Brotherhood wongeye kumenyesha ko utazoja muri iyo Leta nshasha kugeza igisirikare cisubiyeko ku gikorwa cakoze co gutembagaza ubutegetsi, kikagarukana umukuru w’igihugu Morsi mu mabanga yiwe.