Misiri : Mohamed Morsi yaciriwe umunyororo w’imyaka 20

Uwahoze atwara igihugu ca Misiri, Mohamed Morsi yaciriwe umunyororo w’imyaka 20 na sentare yo mu gisagara ca Kayiro.Mohamed Morsi yagirizwa kuba yarataye mu mvuto mbere akanahohotera ubuzima abari mu myiyerekano banka ikiringo ciwe.

Sentare nkuru yo mu gisagara ca Kayiro yaciriye umunyororo w’’imyaka 20 Mohamed Morsi, uwahoze atwara igihugu ca Misiri. Mohamed Morsi yakuwe ku butegetsi mu mwaka w’2013 n’umukuru w’ingabo w’ico gihe General Abdel Fattah al-Sissi, mbere ubu akaba ari we yaciye aja ku butegetsi abanje gukuraho abo batavuga rumwe.

Mohamed Morsi yagirizwa ivyaha vyo gupfunga no guhohotera ubuzima bw’abari mu myiyerekano banka ko asubira kubatwara mu gihe yari kubutegetsi mu mpera z’umwaka w’2012. Sentare ikaba yahevye icaha c’ubwicanyi ku bantu babiri bari mu myiyerekano hamwe n’umumenyeshamakuru biciwe imbere y’ingoro ya Mohamed Morsi, aho abantu batari bake n’amashirahamwe aharanira agateka kazina muntu yararindiriye ko acirwa urwo gupfa nyuma y’ubwo bwicanyi.

Mwomenya ko abari bagize umugambwe wiwe harimwo n’indongozi zikomeye baciriwe nabo nyene umunyororo w’imyaka 20, mbere nabo bakaba bakuweko icaha c’ubwicanyi.

Umushingwamanza wa Mohamed Morsi yamenyesheje ko bagiye guhamagaza urubanza.

General Abdel Fattah al-Sissi,perezida wa Misiri