Amerika : Umuporisi w’umuzungu yarashe umunyagihugu w’umwirabure

Mu ntara ya Carolina y’Epfo, neza na neza mu gisagara ca North Charleston, umuporisi w’umuzungu yarashe umugabo w’umwirabure bivuye ko imodoka yiwe yari ibuze itara rimwe.

Hari ku munsi wa gatandatu igenekerezo rya 4 Ndamukiza, Walter Scott, umwirabure w’imyaka 50 yariko agendesha imodoka yiwe. Ageze mu nzira, umuporisi aramuhagarika kugira asuzume ko iyo modoka ikwije ivya ngombwa. Imodoka ya Walter Scott yari ifise itara rimwe ryamenetse, aca agira ubwoba. Ubwo bwoba bwatumye Walter Scott ata imodoka yiwe yiruka ahungira ahari ikibanza "Jardin Public". Wa muporisi yaciye amukurikiza amasasu menshi mu mugongo, Walter aca arapfa.

Abashingwamanza b’umuryango wa Walter Scott bavuga ko bavuganye n’umuganga yasuzumye ikiziga, bakaba babwiye ikinyamakuru New York Times ko Walter Scott yarashwe amasasu atanu, atatu mu mugongo, urusase rumwe mu rutugu hamwe n’urundi ku gutwi, ariko hari urundi rwoba rwaciye mu mutima wiwe.

Uwo muporisi azwi kw’izina rya Michael Slager w’imyaka 33, ahejeje kumurasa yaciye arondera ingene yohuvya amatohoza. Yitwaje ko Walter yashatse kumwaka inkoho yiwe ya Pistolet, nawe aca arivuna. Ariko rero, naho Michael Slager yitwaza ivyo, hari umuntu yari yinyegeje inyuma y’uruzitiro yafashe isanamu y’ubwo bwicanyi bwose uko bwagenze. Iyo sanamu imaze kuja ahabona, uwo muporisi yaciye agirirwa ibipimo bigirirwa umuntu agize ubwicanyi nk’ubwo, yongera arabazwa n’inyamiramabi.

Kuri uwu wa gatatu igenekerezo rya 08 Ndamukiza, harategekanijwe imyiyerekano yateguwe n’abaharanira agateka ka zina muntu, kugira biyamirize ubwo bwicanyi. Ivyo rero bibaye mu gihe hari haheze iminsi mike ubwicanyi nk’ubwo bubaye kandi i Ferguson (Missouri), i New York canke Cleveland (Ohio), hose ni abaporisi b’abazungu barasa abanyagihugu b’abirabure.

Ubutegetsi bwa Obama butegekanya gufata ingingo zogerageza guhindura ingendo y’abo baporisi hamwe n’uguhindura imigenderanire bafitaniye n’inkehwa z’abirabure ziri muri ico gihugu.

Raba Video yerekana uko vyagenze