Musaga : Abanyagihugu bifatiye umuntu afise inkoho

Abari mu myiyerekano muri komine ya Musaga, bafashe umuntu yari afise inkoho yo mu bwoko bwa pistolet, akaba yari yayambariyeko impuzu z’ikarashishi, munsi kandi hariyo ipantaro y’igisoda.

Abari muri komine ya Musaga, imwe mu makomine imyiyerekano ikomeye cane, abanyagihugu bafashe umugabo yari yambaye impuzu z’ukwinonora imitsi, munsi, yari yambaye impuzu z’igisoda, aho yari afise inkoho yo mu bwoko bwa pistolet. Uwo yafashwe, akaba yaciye ahabwa abajejwe umutekano. Nk’uko aya makuru turiko tuyahabwa na bagenzi bacu bariko bakorera mu Bumanuko bw’igisagara, uwo afashwe akaba aje yiyongera ku wundi yafashwe kuri uyu wa gatatu, igenekerezo rya 29 Ndamukiza, ku mugoroba, uwo nawe bikavugwa ko ari Imbonerakure y’umugambwe CNDD FDD, yitwaje inkoho. Nk’uko bagenzi bacu babivuga, uwo yafatanywe iyo nkoho muri aka gatondo, si umusoda canke umuporisi.

Abanyagihugu bo ku Musaga kandi, bakaba bagiye guhitana abo muri komine ya Kinindo, hamwe na Kanyosha kugira binjire mu gisagara ca Bujumbura hagati, ariko bakavuga ko baciye baraswa na Ndirakobuca Gervais batazira Ndakugarika, bica bituma abari mu myiyerekano bahundagara, aho bamwe ndetse banakomeretse rwose.

Imyiyerekano rero ikaba iriko iraba mu makomine nka yose y’igisagara ca Bujumbura, aho Kinama, Kanyosha na Bwiza bazindukiye mu myiyerekano nabo, biyamiriza ikiring.o ca gatatu ca Petero Nkurunziza.