N’ishavu ryinshi, Lionel Messi yatutse abariko bamwifatira mu gahanga

Abakinyi b’umurwi wa FC Barcelone muri ino minsi ntibatahura ibiriko bishikira umurwi wabo kuko umaze igihe uguma utsindwa. Agashavu rero kaguma kibonekeza kuri abo bakinyi. Lionel Messi yishuye nabi umwe mu bakunzi b’uwo murwi. Kuvuga nabi si ibintu vyari bimenyererwe mu bibereho ya Lionel Messi.

Umurwi wa FC Barcelone umaze igihe utifashe neza. Ugutsindwa kwa FC Barcelone kurababaza bamwe mu bihangange vy’abakinyi kuko bariko batakaza ibibanza vyabo. Ako gashavu kabonetse kuri Lionel Messi amaze gutwara imipira y’inzahabu 4, ari nawe wa mbere afise ivyo bikombe vyinshi kuva umupira w’amaguru wagakinwa kw’isi.

Kuri uwo wa gatanu w’igenekerezo rya 18 Ndamukiza, igihe Messi yari ku kibuga c’indege batahutse bavuye i Valence aho batsindiwe na Real Madrid mu gikombe c’umwami, abakunzi ba FC Barcelone babakiranye ibitutsi vyinshi, aho Messi yateba agashavura bamubwiye ko ari umwana w’igishushungwe. Nawe ati : "Mwa mburakimazi mwe! Mwabuze ico mukora". Ivyo kuvuga amajambo y’ibitutsi ntivyari bimenyerewe kuri Messi.

Ico gihe Messi yatukwa nabi, nawe agahava atwarwa n’agashavu, abakunzi ba FC Barcelone baguma basaba ko umurongozi w’uwo murwi Jose Baromeu n’umumenyereza Tata Martino botanga imihoho.

Bivugwa kandi n’ikinyamakuru Espagnol Sport co muri Espagne ko Messi ashobora kugurishwa, aho kivuga ko umurwi wa Paris-Saint-Germain nawo witeguye gutanga imiliyoni 250 z’amahera akoreshwa i Buraya kugira umutware.

Tubibutse ko kuri uwo w’Imana uheze, umurwi wa FC Barcelone witeturuye utsinda umurwi wa Atletico Bilbao ibitsindo 2 kuri 1, harimwo ica Lionel Messi na Pedro.