Accueil > Amakuru > Ubudandaji > Naho BBN yunganira Reta mu bikorwa vy’ubudandaji bw’akanovera, irakenye (...)
Naho BBN yunganira Reta mu bikorwa vy’ubudandaji bw’akanovera, irakenye abakozi
jeudi 15 Rusama 2014
Impapuro zirenga 500 zigenga ibidandazwa hamwe n’amategeko 1072 nivyo ikigo kijejwe kugenzura akaranga k’ibidandazwa no gushinga amategeko abigenga (BBN) kimaze gushiraho.
Ku va ku wa 3 Kigarama umwaka w’1989 ico kigo gitanguye, umuyobozi wa BBN Gervais Nzinahora avuga ko abanyagihugu bakorana neza n’ico kigo, kugira ntibasange bariko barakoresha ibidandazwa vyataye ikiringo bishobora kubangamira amagara yabo. Ico kigo gisanzwe gikukira ubushikiranganji bw’ubudandaji, cahawe intumbero yo gufasha igihugu gushorera mu makungu ibidandazwa bikwije ibisabwa, gusuzuma akaranga k’ibidandazwa vyinjira mu gihugu, gukingira abaguzi n’ibidukikije hamwe no gukingira itunga ry’igihugu. Mu mwaka w’2011, iryo tegeko rigenga ikigo BBN ryarahinyanyuwe kugira rikigire itegeko rishusha n’ayandi mategeko agenga ibindi bigo nk’ivyo, vyo mu bihugu bigize umuryango wa Afrika y’Ubuseruko.
Mwomenya ko BBN kandi carakoranye n’amahinguriro menshi nka OTB, ARFIC, SOSUMO, SAVONOR, FRUITO, KINJU, BUSECO, REGIDESO, amabagiro y’ibitungwa, imanganzini zidandaza inyama, n’ aho abantu biherereza ibifungurwa n’ibinyobwa. Ariko rero, ico kigo kirakeneye uburyo bukwiye no kwongereza abakozi, kugira kibashe kugenzura neza ibidandazwa vyose vyinjira n’ibisohoka, hamwe n’ibidandarizwa mu gihugu.
Aristide Nizigire
