Nelson Mandela yaraye avuye mu bitaro

Perezida Nelson Mandela yahoze atwara igihugu ca Afrika y’Epfo, yaravuye mu bitaro, yaramazemwo imisi icenda.

Igihe yinjira ibitaro, amakungu yari yahagaritse umutima.

Ibiro vy’umukuru w’igihugu ca Afrika y’Epfo, Jacob Zuma, vyasohoye itangazo rivuga kw’umushingantahe Mandela afise imyaka 94 mur’iki gihe, yavuye mu bitaro ejo ku musi wa gatandatu, inyuma y’aho abaganga baboneye ko yariko aratora mitende.

Bwari ubugira gatatu, umushingantahe Mandela aja mu bitaro mu kiringo c’amezi ane.

Igihe yinjira ibitaro kw’igenekerezo rya 27 ry’ukwezi kwa gatatu, igihugu ca Afrika y’Epfo cari camenyesheje ko yari yanduye mu mahaha.

Perezida Nelson Mandela niwe yabaye umukuru w’Igihugu wa mbere w’umwirabure mu gihugu ca Afrika y’Epfo mu mwaka w’1994.

Arubashwe mu makungu yose kandi arazwi ku ruhara ntangere yagize rwo kugwanira ubungane hagati y’abanyagihugu.