Ngozi : Abakunzi b’ihiganwa rya Rally bazobona ibirori baheruka haheze imyaka 20

Intara ya Ngozi izokwakira kuri uyu wa gatandatu no kuwa mungu ihiganwa ryo gusigana mu miduga bita « Rally », ihiganwa ryari rimaze imyaka mirongo ibiri ritaba mu gihugu c’Uburundi.

Abakunzi b’urukino rwo gusigana mu miduga "Rally" bazosubira kuratira ijisho mw’ihiganwa ryaheruka kuba mu Burundi mu mwaka w’1993. Muri uwo mwaka, harabaye ihiganwa twokwita rito kuko ryitabwe n’abahiganwa batashitse batanu. Inyuma y’intambara Uburundi bwaciye bwinjiramwo, ntivyabaye bigikunda ko ayo mahiganwa abandanya atunganwa kubera amabarabara n’umutekano bitari vyiza.

Ku munsi wa gatandatu no kuw’’Imana igenekerezo rya 26 n’irya 27 Gitugutu 2013, mu ntara ya Ngozi, mu Vyerwa niho iryo higanwa rizobera. Umurwi uriko utegura iryo higanwa umenyesha iyo izoba ibaye intango, ko bazoheza uburyo bubakundiye bakabandanya gutunganya amahiganwa nk’ayo, bongere bahimirize urwaruka gukunda urwo rukino.

N’aho batashoboye kumenyesha amazina y’abazohiganwa, umurwi uriko urategura iyo higanwa umenyesha ko ukwiyandikisha bimaze indwi yose, ko biteze abakwije ibisabwa n’amategeko bagera kuri cumi na batanu, bazoba bavuye mu bihugu bitatu, Uburundi, Urwanda, na Congo.

Ku kibazo c’umutekano w’abiyunguruza batari bamenyereye ayo mahiganwa abera mw’ibarabara, umurwi utegura iryo higanwa umenyesha ko bavyiteguriye mu kumenyesha iryo higanwa abanyagihugu bo mu ntara ya Ngozi no mu micungararo yaho. Umuduga umwe utari mw’ihiganwa uzobanza utangure imbere y’isaha ugenda uramenyesha ko ihiganwa rigira ritangure. Ku ruja n’uruza rw’imiduga mw’ibarabara, uwo murwi umenyesha ko amabarabara iyo miduga ihiganwa izocamwo azoba yugaye mu ntumbero yo kwirinda amasanganya.

Umurwi utegura iryo higanwa uhamagarira abanyagihugu bose bakunda urwo rukino kuzokwishikira mu vyerwa mu ntara ya Ngozi, baje kuratira ijisho mw’ihiganwa ryo gusigana ku miduga batari baherutse.