Nigeria : Igisirikare cemeza ko cabonye aho ba bana banyuruzwa baherereye

Ba banyeshure 223 banyuruzwa mu kwezi kwa Ndamukiza n’abarwanyi ba Boko Haram boba babonywe aho baherereye, nk ‘uko vyashikirijwe n’igisirikare ca Nigeria.

Bavuga ko ari intambwe ikomeye kubona igisisrikare ca Nigeria cabonye aho babanyeshure baburwa irengero baherereye. Inkuru nziza kuri abo bana n’uko twamenye aho baherereye, ariko ntidushobora kubivuga muri uno mwanya, bivugwa n’umukuru w’igisirikare ca Nigeria Marechal Alex Badeh. Tubibutse ko, umukuru w’igihugu Goodluck Jonathan yari yarahiye akarengwa ko atagiye gutanga imbohe z’abanyislamu zifungiwe mu mabohero ya Reta, kugira abo barwanyi nabo baca babaha abo banyeshure.

Ivyo vyatumye amakungu yose ahaguruka kugira bashobore kubatora. Abatari bake baraneguye Reta ya Nigeria hamwe n’igisirikare ari naho Reta ya Nigeria, yahavuye yemera intererano y’ibihugu vya Buraya n’Amerika, kugira nabo bafashe kurondera abo bana babuzwe irengero. Igihugu ca Reta zunzubumwe za Amerika , igihugu c’ Ubufaransa hamwe n’igihugu ca Israel bakaba nabo nyene bararungitse abahinga baja gufasha mu kurondera abo bana. Eka n’Igihugu c’Ubushinwa naco nyene cari casavye ko naco cogira ico gifashije.