Nigeria : Umuhari Boko Haram wasubiye kwiha inkumbi mu Buraruko bw’igihugu

Umurwi w’intagondwa z’abisiramu ba Boko Haram basubiye gutera mu duce two mu Buraruko bushira Ubuseruko bw’igihugu ca Nigeria, abantu bashika cumi akaba aribo bapfuye hamwe n’amazu arenga ijana yabomowe.

Nta kintu na kimwe kiriko kirerekana ko umurwi wa Boko Haram woba ugomba guhagarika indwano. Ku munsi wa kabiri igenekerezo rya 4 Ruheshi ,uwo murwi w’intagondwa wambaye n’impuzu z’igisoda bateye udusagara nka Goshe, Attagara , Agapalwa , Aganjara hamwe na reta ya Borno.

Abo bagizi ba nabi barakoze ibitero bitari bike mu bisagara bitandukanye aho bishe abantu atari bake, hamwe n’amazu yabomowe nk’uko umushingamateka Peter Biye, asanzwe aserukira ako karere abimenyesha. Ibiharuro vy’abapfuye vyose hamwe ntibiramenyekana kuko bakiriko baraharura abahitanywe n’ubwo bugizi bwa nabi.