Nigeriya : Abantu barenga ijana bagandaguwe bunyamaswa

Abateye mu gisagara kiri mu Bumanuko bw’igihugu ca Nigeriya bakica abantu bagera kw’ijana, n’ubu ntibaramenyekana, ariko abanyagihugu bo muri ico gihugu, bakikeka abari mw’idini rya Islam b’intagondwa, kuba aribo bishe iryo sinzi ry’abantu.

Abo bicanyi bakaba bateye abanyagihugu bitwaje amahiri n’ibipanga, ku va mw’ijoro rya 14 Ntwarante, kugeza ku wa 15, eka n’uwa 16 abanyagihugu bakaba bari bagifise ubwoba. Muri ivyo bitero, abantu bashika kw’100 bakaba baciye bitaba Imana, mu gisagara kiri mu Bumanuko bw’igihugu ca Nigeriya aho bita i Kaduna. Ico gitero muri ico gisagara kikaba gikomeye cane, kuko ica haheruka, cabaye mu mwaka w’2011, mu gihe hari hegereje amatora muri ico gihugu, ari naho hapfuye abantu batagira igitigiri, abandi barakomereka.

Abagizi banabi barenga kuri 40, bakaba bateye ibigwati vya Angwan Gata, Chenshyi, Angwan, Sankwai mu ntara ya Kaura, ari naho batikije inganda. Nk’uko bimenyeshwa na Yakubu Bitiyong umushingamateka yatowe i Kaduna, avuga ko abo bicanyi batagira umutima runtu, bugururiye umucanwa mu banyagihugu mw’ijoro hagati, batagira iyo baja, barabica babarashe, abandi nabo, bakaba babaca imitwe bakoresheje imipanga n’amashoka.