ONU: iragiriza igihugu ca Koreya yo m’uburaruko ko cateye ikigendajuru

Inama nkuru ya ONU ijejwe amahoro n’umutekano kw’isi iragiriza igihugu ca Koreya ko cateye ikigendajuru mu kwezi kwa Kigarama mu mwaka uheze w’2012.Iyo nama ikaba isaba Koreya ko itosubira kurungika ibigendajuru bikoresha ubuhinga bwo mu ntambara.

Ibihugu 15 bigize inama nkuru ya ONU ijejwe umutekano, vyaremeje itegeko rihana igihugu ca Koreya kuko carungitse ikigendajuru kirimwo ubuhinga bwo mu ntambara,ico naco kikaba kirenga ku masezerano 1718 na 1874.

Inama nkuru ya ONU ijejwe amahoro n’umutekano isaba kandi igihugu ca Koreya ko co kwubahiriza ibiri mu masezerano ya ONU kandi ko yohagarika ubutakigaruka ibikorwa vyose bijanye no gukora ibigwanisho ruhonyanganda.

Iyo nama nyene irashimishwa no kubona ibintu bigiye mu buryo biciye mu mibano myiza hagati y’ibihugu biciye kandi muri politike,ikaba ishima kandi uruhara rw’ibihugu bigize iyo nama mu gutorera inyishu izo ngorane biciye mu biganiro.

Igihugu ca Koreya yo m’uburaruko coco kikaba cisiguye kivuga ko,carungitse ico kigendajuru mu ntumbero y’ubushakashatsi kandi ko atari mu ntumbero yo guhungabanya umutekano.