ONU yemeje itegeko kuri Syria

Inama y’umutekano y’umuryango mpuzamakungu ONU yemeje ku bwinshi atawuvuyemwo, ingingo yo gusambura ibirwanisho vy’ubumara vya Syria.

Mu nama i New York, abagize akanama k’umutekano bose uko ari 15 bashigikiye integuro yari yumvikanyweko n’Uburusiya na Amerika. Aya masezerano aheraheje imyaka ibiri n’igice y’ukutavuga rumwe muri ONU ku kibazo ca Syria, aho imirwano hagati ya Leta n’abitwaje ibirwanisho yahoneje inganda.

Itora ryabayeI nyuma y’aho ikigo mpuzamakungu gikumira ibirwanisho vy’ubumara, cemereye umugambi w’uko umwaka w’2014 woshika hagati ibirwanisho vya Syria vyasambuwe. Aho yafata ijambo inyuma y’amatora, umunyamabanga mukuru wa ONU, Ban Ki-moon, yavuze ko ari ibintu bigiye mu mateka, ngo amakungu yakoze ico ajejwe. Ibirwanisho vy’ubumara vyarakoreshejwe muri Syria mu kwezi kwa Myandagaro, bihitana abanyagihugu amajana.

Leta zunzubumwe z’Amerika zemeje ko ari Leta ya Bashar al Assad yakoresheje ivyo birwanisho, ariko Syria n’Uburusiya buyishigikiye bikabihakana, bikavuga ahubwo ko ari abarwanya Leta babikoresheje.