RD Congo : Abarwanyi ba FDLR bari hagati y’1500 n’2000 bariko barondezwa urushinge

Umugambi wo kurondera abarwanyi baba FDLR bari mu gihugu ca Repuburika iharanira intwaro rusangi ya Congo uriko urabandanya, naho abo barwanyi bivugwa ko baca bahungira mu mashamba babonye abasirikare b’ico gihugu.

Abarwanyi bari mu muhari wa FDLR bagera kw’160 baramaze kwakwa ibirwanisho, nk’uko bivugwa n’umuvugizi w’igisirikare ca Repuburika iharanira intwaro rusangi ya Kongo. Abasirikare rero bakaba batariko barwanya aba FDLR kugira babarase, ahubwo bakaba bariko barondera abo barwanya igihugu c’Urwanda kugira babake ibirwanisho. Abarwanyi bagera ku 1500 n’ibihumbi bibiri bo mu muhari wa FDLR bakaba aribo bivugwa ko bakironderwa n’igisirikare ca Repuburika iharanira intwaro rusangi ya Congo, kugira bakwe ibirwanisho, basubizwe mu buzima busanzwe.

Kuri uyu w’Imana igenekerezo rya 22 Ntwarante, abasirikare ba Repuburika iharanira intwaro rusangi ya Kongo, bakaba bariko bakurikira abo barwanyi muri Kivu y’Ubumanuko, ariko abo ba FDLR bakaba baciye banyikira mu mashamba ya Mwenga, abandi baja mu banyagihugu.

Tukabamenyesha ko abo barwanyi bariko barakwa ibirwanisho mu gihe bagirizwa guhunagabanya umutekano w’akarere k’Ibiyaga binini, harimwo kwiba abanyagihugu, kwica, gufata abagore ku nguvu n’ibindi vyaha bihohotera agateka ka zina muntu.