Abasirikare basambuye amararo y’inka yahora mu Rukoko

Amararo y’inka yahora ari mw’ishamba cimeza rya Rukoko yasambuwe n’abasirikare b’Uburundi. Mu gisirikare bavuga ko ari ku mvo z’umutekano wo muri iryo shamba.

Abungere b’inka bakorera ku mararo yahora mw’ishamba cimeza rya Rukoko bagirizwa gukingira ikibaba abagizi ba nabi bahungabanya umutekano bava muri iryo shamba. Mu nama y’umutekano iheruka guhuza umushikiranganji w’intwaro yo hagati mu gihugu hamwe naba buramatari b’intara, Anselme Nyandwi, buramatari w’intara ya Bubanza yari yasavye ko abo bungere bakorera mw’ishamba rya Rukoko bokurwayo ku mvo z’umutekano. Anselme Nyandwi yamenyesheje ko hari n’igihe abo bungere bagurisha inka baba bajejwe kuragira, bagaheza bakabwira ba shubuja ko zibwe n’abarwanyi.

Abasirikare b’Uburundi bakorera muri iryo shamba rya Rukoko bafashe ingingo yo gusambura ayo mararo y’inka. Ku muhingamo wo kuri uwu wa gatatu akaba ariho ayo mararo y’inka yo mw’ishamba rya Rukoko yasamburwa n’abasirikare.