Rwanda : Uwahoze arongoye igendereza ryo hanze y’igihugu yagandaguwe

Abatavuga rumwe n’ubutegetsi bw’Urwanda bo mu mahanga bamenyesheje urupfu rwa Colonel Patrick Karegeya yahoze arongoye gushika mu mwaka w’2004 igendereza ryo hanze y’igihugu c’Urwanda, urupfu rwabereye i Johannesburg, mu gihugu ca Afrika y’epfo. Colonel Patrick Karegeya yatowe ikiziga mu cumba co kw’ihoteri Michelangelo Towers, iri muri karitiye ya Sandton, mu gisagara ca Johannesburg.

Amakuru dukesha RFI amenyesha ko ku murango wo kw’igenekerezo rya 31 Kigarama 2013, Patrick Karegeya yamenyesheje abo baganiriye ko afise umubonano na Apollo, uwo bashaka kuganira, mw’ihoteri Michelangelo Towers. Amasaha ya nyuma bamuherukirako akaba ari isaha imwe n’iminota mirongo itatu z’ijoro.
Mu gatondo ko ku munsi w’ejo igenekerezo rya mbere Nzero, niho umwishwa wiwe yaja kuri iyo hoteri gusaba ko yobonana na Patrick Karegeya. Yinjiye mu cumba yari arimwo, yasanze yagandaguwe, abanje kunigwa, uwo Apollo bivugwa ko bari kumwe akaba atashooboye kuboneka, nk’uko ayo makuru abandanya abimenyesha.

Colonel Patrick Karegeya akiri mu gisirikare c’Urwanda

Ubutegetsi bwa Kigali buriko buratungwa agatoke

Abatavuga rumwe n’ubutegetsi bw’Urwanda bamenyesha ko urupfu rwa Patrick Karegeya rwoba rurimwo imvo za poritike, kandi yoba yagandaguwe n’ubutegetsi bw’i Kigali. Général Kayumba Nyamwasa, yahoze ari umukuru w’ibiro bikuru vya gisirikare, asanzwe nawe nyene ari mu buhungiro mu gihugu ca Afrika y’epfo yasiguye ko urupfu rwa Patrick Karegeya rufise umvo za poritike, ivyo akabivuga yisunze ko nawe yahaswe kugandagurwa mu mwaka w’2010.

Amakenga ni menshi kuri urwo rupfu rwa Col. Patrick Karegeya. Abamuzi bamuvuga nk’umuntu yahora yama yikeka kandi yikingira abashobora kumuzimanganiriza ubuzima. Amakuru atangwa na RFI amenyesha ko aho Patrick Karegeya yari mu gihugu ca Afrika y’epfo, yari yarasavye ko igendereza rya Afrika y’epfo rireka kumucunga kugira agire umwidegemvyo wo kwishira n’ukwizana.

Colonel Patrick Karegeya yari amaze imyaka itandatu mu buhungiro mu gihugu ca Afrika y’epfo. Yahoze ari umuyobozi mukuru w’igendereza ryo hanze y’igihugu c’Urwanda kuva mu mwaka w’1994 gushika mu mwaka w’2004. Imbere y’uko hibonekeza ukutumvikana, Patrick Karegeya yahoze ari mu begereye cane umukuru w’igihugu Paul Kagame. Yaratawe mu mvuto kabiri kose, ahava ahunga igihugu mu mwaka w’2007.