Ryan Giggs yahaye intsinzi Manchester United

Ryan Giggs yatsinze igitsindo mu rukino rugira 999 akiniye umugwi wiwe Manchester United, bituma uja imbere ya Manchester City uwukurikira uwurusha amanota 15.

Uwo mukinyi ava mu gihugu ca Wales yahaye intsinzi Manchester United inyuma y’igitsindo ca mbere cinjijwe na Rafael ari kure, intsinzi ica itahukana Manchester United itsinze ibitsindo bibiri kuri kimwe ca QPR.

Umukinyi ava mu gihugu ca Bresil, Rafael, yerekanye kandi ko akomeye cane mu gukina inyuma, igihe yakuramwo umupira wa Chris Samba uri ku murongo w’igoli.

QPR yavyifashemwo neza bavuye mu karuhuko, ariko Giggs yahamereye magabo aca atsinda hasigaye iminota cumi ngo urukino ruhere.