Somaliya : Abantu bagera kuri batandatu nibo bitavye Imana

Umurwi w’intagondwa za Al Shabaab uriyemerera ko ariwo wagize igitero hafi y’umuryango w’ikibuga c’indege mpuzamakungu ca Mogadishu mu gihugu ca Somaliya, maze abantu barenga batandatu bakahasiga ubuzima n’abandi benshi bakomeretse.

Umwihevyi rero akaba yateze igisasu mu muduga, maze gica giturikira hafi y’umuryango waho ku kibuga c’indege. Umuduga warimwo rero ico gisasu, ukaba wagongeshejwe uwundi muduga wo mw’ishirahamwe mpuzamakungu ONU, ariko Imana yakinze kuko uyo muduga, uri mu bwoka bw’iyitamenwa n’amasasu. Abantu benshi rero bakaba bakomerekeye muri ico gitero c’umwihevyi. Abakomeretse bakaba bari abakozi b’ishirahamwe HCR ryo gutabara imbabare.

Umurwi wa Al shabab rero ukaba wagize ico gitero mu kibanza hafi y’ahasanzwe hacungerewe n’abasirikare bo mw’ishirahamwe ry’ubumwe bw’Afrika, ndetse aho mu micungararo y’ikibuga c’indege, akaba ariho hari n’ibiro vy’abaserukira ibihugu vyabo muri Somalia n’ibiro vy’amashirahamwe mpuzamakungu.