Somaliya: Ibisasu vyahitanye abantu 15 i Mogadishu

Igipolisi co muri Somaliya cavuze ko hari ibisasu bibiri vyatezwe ku murwa mukuru wa Mogadishu bihitana abantu 15.

Igipolisi cavuze ko kimwe muri ivyo bisasu catezwe mu buriro bwitwa Village busanzwe bufunguriramwo cane abamenyeshamakuru hamwe n’abashinzwe umutekano.

Amakuru dukesha BBC Gahuzamiryango avuga ko Ikindi gisasu ngo catezwe mwi hoteli yitwa Muna ibamwo cane abashingamateka. Aho hantu hose hegereye ikirimba c’umukuru w’igihugu. Nta muntu aremeza ko yateze ivyo bisasu ariko umurwi w’intagondwa z’Al Shabab wigeze gushaka gutera aho hantu hose mu gihe giheze.

Twobibutsa ko ivyo bishitse mu gihe abasirikare b’Uburundi bari mu gihugu ca Somaliya mu gufasha kugarukana umutekano, n’ugufasha ndetse mu gukomeza ubutegetsi muri ico gihugu, baronkejwe ku munsi w’ejo imfashanyo na Leta zunzubumwe z’Amerika babicishije ku buserukizi bw’ico gihugu i Bujumbura.