Accueil > Amakuru > Mu makungu > Syria : Abantu 300 bari bafashwe n’umurwi w’abajihadiste barekuwe
Syria : Abantu 300 bari bafashwe n’umurwi w’abajihadiste barekuwe
mardi 7 Ndamukiza 2015
Abantu bagera ku 300 bari bafashwe n’umurwi w’abarwanyi mu gihugu ca Syria, barekuwe nk’uko aya makuru yemezwa n’aba Kurdes baba mu gace ka Ibleb, mu Buraruko bushira Uburengero bwa Syria.
Abo banyagihugu bari bafashwe bakaba barekuwe kuri uyu wa mbere uheze, inyuma yaho habanje kurekurwa aba jihadiste batatu bari bafashwe n’abasirikare b’aba kurdes nk’uko vyemezwa na Nawaf Khalil, umuvugizi w’umugambnwe wa PUD (Parti de l’union démocratique) usanzwe ukorera mu bihugu vya Buraya. Intagondwa z’abajihadiste zisanzwe zunze ubucuti n’umuhari wa Al-Nosra, zikaba zikomeye mu karere ka Idleb, aho izo ntagondwa zisanzwe zisa n’iziharwanira kugira zihagire ikirindiro gikomeye.
Amakuru y’irekurwa ry’abo banyagihugu bagera kuri 300; akaba ryanezereje abari mu mashirahamwe aharanira agateka ka zina muntu aho mu gihugu ca Syria. Tukabamenyesha ko haheze imyaka ine, igihugu ca Syria kiri mu mirwano idahera; aho abanyagihugu batari bake, bamaze guta izabo, baguhungira mu mihingo itandukanye.
Aristide Nizigire
