Accueil > Amakuru > Mu makungu > Syria: Isango nshasha ku biganiro
Syria: Isango nshasha ku biganiro
mardi 26 Munyonyo 2013
Umunyamabanga mukuru w’ishirahamwe mpuzamakungu ONU Ban Ki moon avuga ko ibiganiro hagati ya Syria n’abayigwanya bizotangura kuva ku wa 22 Nzero umwaka uza, i Geneve mu gihugu ca Suisse.
Hari haheze igihe kitari gito hari igitutu gikomeye ca Reta zunzubumwe z’Amerika n’Uburusiya, vyasaba ko haba ibindi biganiro bikurikira inama yiga ikibazo ca Syria, ndetse hakajaho na Reta muri Syria, ihurikiyemwo bose kandi yimfatakibanza. Abatavuga rumwe na Syria barimwo n’abayirwanya hakoreshejwe ibirwanisho, bakaba basaba ko umukuru w’ico gihugu yobanza gutanga imihoho akava ku butegetsi.
![](local/cache-vignettes/L300xH345/bashar3-ef6ff.jpg?1521557304)
Tukabamenyesha ko ico gihugu ca Syria kimaze igihe kitari gito mu ntambara z’urutavanako hagati ra Reta n’abayirwanya, ndetse umukuru w’igihugu Bashar al Assad wa Syria akaba yaragirijwe akatari gake ko yakoresheje ibirwanisho birimwo ubumara mu ngwano n’abo batavuga rumwe, harajaho n’umurwi w’amatohoza w’ishirahamwe mpuzamakungu ONU kugira barabe hagati ya Reta n’abarwanyi uwoba yagirwa ako kabi ko gukoresha ibirwanisho ruhonyanganda.
Aristide Nizigire