Tambwe Hamissi : "Nta bwoba kuko imikenyuro ya Tanzaniya ndayizi"

Umukinyi Tambwe Hamissi abona ko urukino kivandimwe ruzohuza Intamba mu Rugamba n’umurwi Taifas Stars userukira igihugu ca Tanzaniya, ari urukino rusanzwe cane kuko nta na rimwe ico gihugu kirigera kibatsinda. Abona ko bokwitegurira cane cane iyindi mirwi bizohurira mu nkino za CECAFA.

Tambwe Hamissi mu kiganiro n’ikinyamakuru www.igihe.bi

Umukinyi w’umusatirizi Tambwe Hamissi ari mu murwi nserukira gihugu Intamba mu Rugamba akina no mu murwi Simba Super Sport, araremesha abakinyi basangiye urukino rwo ku munsi w’Imana n’umurwi Taifas wo muri Tanzaniya. Kubwa Tambwe Amissi, gukina n’umurwi nserukira gihugu wa Tanzaniya nta bwoba kuko abakinyi bawukinamwo bose barazinanye. Ati :"Nta bwoba uwo murwi wodutera kubera duheruka no kuwutsindira iwabo bitatu ku busa". Tambwe avuga ko umukenyuro w’igihugu ca Tanzaniya mu mupira awuzi, ari naco gituma badashobora kubaca mu ryahumye.

Uwo musatirizi aravye mu kibanza c’imbere akinamwo asanga umurwi nserukira gihugu watumyeko abakinyi batari bahuje ikibanza (numero) avuga nka Didier Kavumbagu na Saido Ntibazonkiza bose b’abasatirizi, bakina hanze y’Uburundi. Umumenyereza niwe azomenya uwo atanguza kuko ku bwiwe bose barashoboye. Ati :" Akamaro k’umusatirizi n’ugushikana umupira mw’izamu ata gukebaguzwa".

Tambwe aragaruka akavuga ko naho botsinda Tanzaniya batokwijajara kuko bimirije inkino za CECAFA, ku bw’ivyo agasaba abarongoye inkino z’umupira w’amaguru mu Burundi ko borondera inkino nyinshi za kivandimwe mu ntumbero y’imyiteguro.

Arangiza avuga ko ataramenya umurwi azokinamwo muri myinshi imurondera, aho ni inyuma y’amasezerano n’umurwi wa Simba asigaje umwaka umwe gusa.