Uburusiya bwihoye ibihugu vyabafatiye ibihano

Igihugu c’Uburusiya, inyuma y’ugufatirwa ibihano n’ishirahamwe ry’ubumwe bwa Buraya, cafashe ingingo yo kwankira kwinjira ibifungurwa nka vyose vyahora vyinjira mu gihugu c’Uburusiya, bivuye i Buraya, Amerika n’ahandi.

Iyo ngingo y’igihugu c’Uburusiya yaje nk’iyihora ivyo bihugu vyaheruka gufatira ibihano ruhasha muvy’ubutunzi igihugu c’Uburusiya, kubera ikibazo ca Ukraine.
Umushikiranganji wa mbere w’Uburusiya, Dmitry Medvedev, yamenyesheje ko Uburusiya butazokwemera ko hinjira ibifungurwa bimwe bimwe nk’inyama, amafi, ivyamwa, imboga hamwe n’ibihingurwa mu mata vyose.

Dmitry Medvedev, umushikiranganji wa mbere w’Uburusiya

Muri iyo ngingo y’igihugu c’Uburusiya, ibifungurwa vyankiwe kwinjira ni ibizoba bivuye mu bihugu vy’ishirahamwe rya Buraya, Reta zunzubumwe za Amerika, Canada hamwe na Norvege. Ivyo bifungurwa bizoreka kwinjira mu kiringo kingana n’umwaka wose.

Mwomenya ko naho igihugu c’Uburusiya cafashe iyo ngingo, gisanzwe gikenera hanze y’igihugu ica gatatu c’imfungurwa zitunze abanyagihugu baco. Abahinga muvy’ubutunzi bakabona ko ico gihugu c’Uburusiya kizoca gikenera ahandi gikura ivyo bifungurwa bisubirira ivyo vyahora biva mu bihugu vy’ishirahamwe rya Buraya, Reta zunzubumwe za Amerika, Canada hamwe na Norvege vyabujijwe kwinjira. Mu ngaruka za mbere zishobora guca zibonekeza, n’uko ibiciro vy’ibifungurwa muri ico gihugu bishobora guca biduga.